Monday, November 9, 2015

Нэгэн хэргийн эргэн тойронд

Эрүүл мэндийн салбарыг тангараг өргөсөн хэдэн эмч нуруун дээрээ үүрсээр өдий хүрсэн. Яам нь бол дампуу, би зах зухаас нь мэднэ, хэ-хэ. Сайдыг нь сая барьж аваад хорьчихлоо. Шийлэгийг бол танихгүй, гэмтэй гэмгүйг нь хэлж чадахгүй, шүүх тогтоох биз. 
Нөгөө талаас - зүв зүгээр байсан хүнийг хорьж цагдаад, шалгаж байцаагаад байдаг эрх зүйн орчинтой улс манайх бас биш. Мэдээллийн фронтоор болсон үйл явдлыг яаж тайлбарласныг харьцуулж үзэцгээе.
Шийлэгдамба: Багын найзаасаа хувийн хэрэгцээнд мөнгө зээлээд ажлын сейфэнд хадгалж байсан. Шалгуулж дуустлаа ажлаа өгье. Эргээд нүүр бардам, нэр цэвэр уулзнаа.
Намын нөхөд нь: Бидний анд авилга авах хүн огт биш. Ер нь АТГ манай намын гишүүдийг байнга шалгаж дарамталсаар ирсэн. Хэлмэгдүүлэлтээ зогсоо!
АТГ: Их хэмжээний бэлэн мөнгө авч байгаад үйлдэл дээрээ баригдсан.
Өөр нэг сайд: Өрөөнийхөө сейфнээс үтэр түргэн салах нь зөв юм байна.
Энхбаярын дайснууд: Намын даргынх нь хар мөр. Намд мөнгө олж ир гэж залуучуудаа дарамталдаг. Залуучууд нь албан тушаал дээр очингуутаа ийм л зүйл хийж явна.
Энхбаярын талынхан: Даравч дардайна, булавч бултайна. Үнэн ялнаа, харж байгаарай. Бидний цаг ирнэ! Энхбаяр дарга - ариун хүн. Энэ хүн л монгол төрийг төвхөнүүлэх үйлтэй.
Элбэгдоржийн фанатууд: Элбэгээ л авилгалтай тэмцэж байна. МАН, МАХН - бүгд авилгачид. Шоронд суулгаж, гянданд хатаа.
Жижүүртэй хонож буй эмч: Маргааш хүүхдийн номны мөнгийг цалин буутал хэнээс зээлж аргалдаг юм билээ?

No comments:

Post a Comment