29 June 2016

Сонгууль-2016

UPD 2016.06.30 03:15
Сонгууль, улс төрийн сэдвээр сүүлийн үед би санаатай пост нийтлээгүй. Тэртээ тэргүй social media-гаар хангалттай бөмбөгдөж байсан шүү дэ. 4 жилийн өмнө Эх орондоо байгаагүй болохоор санал өгч чадаагүй. 
Энэ удаад манай тойрогт дэмжчихээр хүн байгаагүй болохоор санал өгөх хэрэг байгаа ч юмуу үгүй ч юмуу гэсэн эргэлзээ байсан. Явж явж МАНАН болох биз гэсэн хар таамаг саналаа өгөх хэрэг байна уу гэдэг бодлыг төрүүлж байсныг нуухгүй. Гэхдээ би саналаа өгсөн.
Энэ удаад монголчууд хүн биш намыг нь дэмжлээ. Яг үнэндээ МАН-аас дэмий нөхдүүд гарч л байна, гэхдээ энэ ард түмний сонголт хойно хүлээн зөвшөөрөхөөс аргагүй. Ингээд нэг намд хамаг эрх мэдэл, хариуцлагыг нь тохох нь нэг бодлын зөв. АН-ын хувьд нэгийг бодож хоёрыг тунгаах байлгүй дэ, дэндүү далаараа тавиуллаа. Төр барьсан 4 жилийнх нь үнэлгээг ард түмэн хийсэн гэж ойлгох хэрэгтэй. Хувийн прогнозоор сонгуулийн өдөр дөхөх хэрээр МАН-ыг ялахын хувьд ялах байх, гагцхүү 39 суудал авч ЗГ-аа дангаараа байгуулж чадахнуу үгүй юу гэж таамаглаж байсан чинь үнэмлэхүй ялалт авлаа. Одоо яахыг нь харах үлдлээ. Тэглээ гээд улс төрчдийн талаарх миний бодол хэзээ ч өөрчлөгдөхгүй - выборы! выборы! кандидаты - 3,14доры! Нам лам хоёроос хол байх хэрэгтэй нөхдөө.

2016.06.29 00:20

25 June 2016

The Lion City II - Majulah

Гурван жилийн хөдөлмөр, 500 өдрийн зураг авалт, 1 сая фото-зурагнаас бүрдсэн time-lapse.

MTM Wood

Модон эдлэлийн орос компани: http://mtmwood.com/
Онцлог нь "торцевые изделия" хэмээн нэрлэгддэг бүтээгдэхүүн хийдэг юм. Модны ширхэг босоо байхаар зохион бүтээгдсэн гэсэн үг. Канадууд бас зах зээл дээр ийм бүтээгдэхүүн сайн хийдгээрээ алдартай. Надад шатрын хүлэгнүүд нь л их таалагдав, жишээ нь:

24 June 2016

Магистр

Сургуулиа төгсөөд 16 жил болсны дараа компьютерийн програм хангамж мэргэжлээр магистраа хамгаалав. Яахав, сурахад оройтдоггүй юм гэдэг шүү дэ, хэ-хэ. Сургууль маань Мэдээлэл, холбооны технологийн сургуультай нэгдэж. Тэнхимд бидэнд багшилж байсан ахмад багш нараас гадна шинэ чадалтай залуучууд олноороо ажиллаж буйд баярласан. Залгамж үе бэлдэгдэж л байна.
Сая лхагва гаригт дипломоо гардан авлаа. Диплом болон хавсралт монгол, англи хэл дээр бичигдэхийн сацуу монгол бичгээр үйлдэгддэг болж. Хавсралт нэг ийм төрхтэй:
Дараачийн шатанд ахих бодол одоогоор алга. 16 жилийн дараа бодол өөрчлөгдвөл тэр л биз ;)

23 June 2016

Euro-2016. Исландын хөтлөгч

94 дахь минут дээр 2 дахь гоолоо хийж Австрийн шигшээг ялснаар плэй-оффд түүхэндээ анх удаа шалгарсан Исландын шигшээ сайн байна. Хөтлөгчийн баяр хөөрт хязгаар алгаа, таталт өгөхөд бэлэн байна ш дэ.

22 June 2016

Surreal Tattoos

Илья Брезинскийн (Беларусь) уран бүтээлээс.

Земфира - Прости меня, моя любовь


Их гүрнүүдийн задрал

XIX-ХХ зуун. Франц, Испани, Португали болон Их Британий задрал.

20 June 2016

Элчингийн тамхины наймаа

Нутаг нэгтнүүдээсээ ичих юм. Зарим иргэд нь гадаадад хулгай хийнэ, элчингийн ажилчид нь болохоор контрабандаар бараа тээвэрлэнэ. Ямар хэрэг байна, цус гэж? За нэг иргэн өлсөж үхэхийн даваан дээр бургер хулгайлсан бол одоо дүүрч, элчингийн нөхдүүд бол цэвэр мөнгө хөөж хориотой бараа зөөж байгаа шүү дэ. ОХУ-д буй манай элчингийнхэн гэж дүйрсэн улс юм. Ерөөсөө байж байгаад л тамхи зөөж байгаад баригддаг. 18-нд Украинд бас баригдаад л авч. Закарпатын "Дьяково" боомт буюу Румынтэй хиллэдэг газар болсон үйл явдал.

Оросын дипломат дугаартай, монголын элчингийн машин. Албан ёсоор бол Москва-Ром чиглэлд дипломат шуудан тээвэрлэж буй юм гэнэ. Шалгаад үзэхлээр 29,145 хайрцаг тамхи байдаг. Элчин сайд нь хэн байнаа орост? Хэрэгт холбоотой уродуудтай нь цуг бүгдийг нь татмаар юм 3,14z! Улсын нэрийг бузар хэрэгтэй холбочилгүй элчинд ажиллаад явчих боловсон хүчин монголд бий дэ уг нь.

Амиа золиослогчийн довтолгоо

Өчигдөр дахиад нэг оросын армийн албан хаагч Сирид амиа алдсан мэдээлэл цацагдав. Амиа золиослогч иргэдэд тусламжийн бараа тарааж байсан цэгрүү довтлох үед тэрбээр хүнд шархадсан гэнэ. Эмнэлэгт амийг нь аврах гэж бүтэн нэг өдөр тэмцсэн ч гэлээ чадаагүй байна.
Уржигдар халифатын амиа золиослогч дайралт хийж буй бичлэг мөн нийтлэгдсэн байгаа:

Хэдийгээр галын нягтаршил их байсан ч бөмбөг тээсэн машин танкруу тулж ирээд тэсэрч байгаа юм. Тус бичлэгт гарсан энэ хүн оросын амиа алдсан цэрэг гэсэн таамаглал бий.
Халифат амиа золиослогчдыг өргөн ашиглаж байгаа. Төмрөөр битүү хуяглаж гагнасан pick-up юмуу ачааны машинд бөөн тэсрэх бодис, бөмбөг ачаад дайралт хийхэд зогсооход бэрх л дэ.

Өөрийн өртөг +

Business Insider-т нийтлэгдсэн мэдээллээс.
Зарим бизнесийн салбарт нэмүү өртөг өөрийн өртгийг олон дахин давах нь бий. Тухайлбар байр цэвэрлэгээ болон цас цэвэрлэгээ харгалзан 5900% ба 3900% нэмэгдэж тооцогддог.

Барааны хувьд нүдний шилний раам хамгийн их нэмүү өртөгтэй - 1329%. Бүсгүйчүүдийн брэнд дотуур хувцас 1100%. Жинсэн өмд - 650%. Нэртэй дизайнерийн гутал - 354%, харин хуримын даашинз - 290%.
Аяга кофе кафегаас авч буй бол дундажаар 2900% нэмж төлж таарна. Савалгаатай ус - 2000%. Ресторан дахь дарс - 400%. Попкорн - 900%.
Цахим ертөнцийн хувьд: кабелийн интернэт - 4900%, утасны цэнэглэгч - 672%, HDMI кабель - 1900%, рекорд болох SMS - 5961%.

18 June 2016

1930-1940. МАА-ийн офицерууд. 1-р хэсэг

Хар цагаан хөрөг зурагнууд өнгөтөөсөө ч илүү тухайн үеийнхээ уур амсьгалыг агуулдаг мэт. Эдгээр царайнуудыг хараад л байвал хараад л баймаар.
Лхагвасүрэн жанжин.
 
Цаг үеэсээ түрүүлсэн үс засалт.
Загвар өмсөгч шиг л гарч.
Босоо Ганбаатай төстэй төрх таарав
Харин энэ офицер портунтай жаахан адилхан юм.
Өмнөх офицерийн цол бага, нас залуу байх үеийн фото байна.
Жанжины залуу үеийн 2 фото.

14 June 2016

Шимпанзе

Биологч Франс де Вааль олон жил шимпанзе сүргийн амьдралыг судалж ажиглажээ. Ингээд 1982 онд "Шимпанзегийн улс төр: Бичнүүдийн эрх мэдэл ба секс" нэртэй бүтээлээ гаргасан. Ингэхдээ улс төрчид болон шимпанзед төстэй шинж чанар олон байдгийг онцолсон. 
Тус бүтээлд анхаарал хандуулах хэрэгтэй юм шиг:
- Улс төрийн халз мэтгэлцээний үед дууг нь хааж хэсэг үзэх хэрэгтэй. Ингэснээр агуулгыг нь орхиж зөвхөн визуал контактад анхаарал төвлөрнө. Нэр дэвшигч зогсож, сууж буй байрлал, царайны хувирал, дохио зангаа зэрэг нь ихийг илтгэнэ. Тэдний ярих зүйл ерөнхийдөө ойлгомжтой: худал амлалт өгнө, бие биенээ доош нь хийнэ, өөрийгөө дөвийлгөнө. Нэг нэгнийгээ шоолж ёжлох, өөрөө өндөр, том ханхар биетэй харагдах гэж хичээх зэрэг нь өнөөгийн улс төрд энгийн үзэгдэл. Энэ нь сармагчны хувьд хамгийн сайн хийдэг үйлдэлтэй нь яг ижил: хөл дээр босч ирнэ, мөрөө тэгшилж цээжээ дэлдэх, муухай дуу авиа гаргаг зэргээр өрсөлдөгчөө айлгах, эргэн тойронд байгаадаа өөрийн давуу байлыг харуулах явдал юм.
- Сүргийн эрх мэдлийг хамгийн чадалтай нь авдаггүй. Хамгийн олон чадалтай сармагчингуудын дэмжлэгийг авч чадсан нь сүргийн манлайд гардаг. Тиймээс шимпанзе хүний хийдгийг л хийдэг: өөрийн холбоо сүлбээг бататгана, өрсөлдөгчийн холбоо сүлбээг тасалж хамсаатнуудыг нь өөртөө татна, үгэнд орохгүй нэгнийг гадуурхана, наймаа тохироо хийнэ, хов жив хөөцөлдөж гүтгэж доромжилно г.м. Шимпанзе сүрэгт хөгшин лидер далдуур ажлаа амжуулахдаа залуучуудын өрсөөлдөөнийг овжин ашиглах нь элбэг. Тэрч байтугай худал чухал дүр эсгэх, дуугаа намсгаж харьцах зэрэг арга барил ч шимпанзед бий. 
- Эмэгчинд тал засах үүднээс үр төлийг нь гижигдэж, тоглох явдал гардаг. Хүүхэд тэвэрч камерын өмнө зогсох улс төрч тэднээс ямарч ялгаагүй юм. Эрэгчин хоорондын тэмцэлд эмэгчингүүдийн дэмжлэгийг авах нь маш чухал, бараг ялалтын нөхцөл байдаг гэж байгаа.

The Team

Дажгүй сериал.

13 June 2016

Jargal De Facto

Эдийн засагч, нийтлэгч Жаргалсайхан гуайн радио нэвтрүүлэгт би дуртай. Бизнес FM 98.9-өөр цацагддаг юм. Мөн өдөр тутмын сонинд гардаг нийтлэлүүд нь зүгээр. Зурагтын ярилцлагыг нь төдийлөн сонирхдоггүй (угаасаа зурагт бараг үздэггүй болохоор). 
Жаргалсайхан нь олон түмний нүдийг нээж, мэдлэгт нь нэмэр өгч буй нь маш том үйл хэрэг, хөрөнгө оруулалт юм. Асуудлын яг голыг олж хэлдэг, үнэн зөв мэдээлэл хүргэдэгт нь би хувьдаа талархдаг. Аливаа нэг талыг баримтлаагүй, эрүүл саруул өнцгөөс асуудалд ханддаг, нам гэж дөвчигнөдөггүй ийм хүн манай нийгэмд цөөхөн. Тиймээс хэлж ярьж буй зүйл нь бусдынхаас чухал юм. Сонсож дотроо нэгийг бодож тунгааж байх хэрэгтэй.
Харин мань эрийн нэрийг сонгуулийнхаа сурталчилгаанд ашиглах нь (жишээ нь: нэг нөхөр нэвтрүүлэгт нь оролцсон хэсгийг хэрчээд FB-д байршуулж) жаахан арчаагүй талдаа үзэгдэл юмуу да.

10 June 2016

Тараалт

Баабарыг би төдийлөн таалдаггүй, гэхдээ сайн нийтлэгч гэж үздэг. Түүхийн холбогдолтой зарим нийтлэл нь өрөөсгөлдүү, мөн найз зарим нийтлэлдээ хошин өнгө, ёжлол нэмэх гээд жаахан оновчгүй юм бичсэн байдаг. Тэгсэн ч гэлээ Баабарыг унших хэрэгтэй.
Сая мань эр гоё хэлж: 2008 онд олсноо тараасан, 2012 онд зээлж тараасан, одоо байхгүйгээ тараагаад эхэллээ.
Энэ чигээрээ үргэлжилбэл улс орноо л тараагаад дуусна. Тэр хувьцаа бол цэвэр санал худалдаж авах гэсэн арга ядарсан оролдлого.
За тэгээд төгсгөлд нь өнөөдрийн хувьд олж харсан хамгийн гоё зураг:
 Хэн гэдэг нөхөр юм бол до энэ, зайлуул, хэ-хэ-хэ.

Stressed Out - Postmodern Jukebox Twenty One Pilots Cover


Оригинал нь: https://youtu.be/pXRviuL6vMY

A Kinetic Daylighting and Shading System


Evolutiion

09 June 2016

Лиценз олголт

8 жилийн өмнөх бичлэг файлууд дундаас гарч ирэв. Ашигт малтмал дээр бөх байрын бадриун эрчүүд өглөө эрт ирчихсэн, хаалга онгойнгуут өөрийн хүнийг чихэж оруулдаг байж билээ. Рэгби манайд ер нь хөгжих байх шүү. Өөрийн хүнийг оруулж чадсан нь гараа өргөж уухайлаад, чадаагүй нь юуч үгүй хоцордогсон.

Аквариум - Серебро господа моего

Борис Гребенщиков.

07 June 2016

J-AX & Fedez - Vorrei ma non posto

Орчин үеийн итали эстрадын төлөөлөл.

Эрүүл мэндийн салбарын тухай

Өөрийгөө эмчлэх гэж оролдох нь аюултай үзэгдэл. Би энд эрүүл мэнддээ анхаарах тухай яриагүй шүү найзууд. Хүн зөгийн балтай ус уух, гүйлтээр хичээллэх, тогтмол иж бүрэн шинжилгээнд хамрагдах нь өөрийнх нь сонголт. Зөв ч амьдралын хэв маяг. Харин нэгэнт өвдсөн бол өөрөө өөрийгөө оношилж, бие дааж эмчилгээ хийвэл яавч сайнаар төгсөхгүй. Боломж байгаа бол эмчид ханд. Эмчид хандана гэдэг нь нэг өдөр ижил мэргэжлийн олон эмчээр тойрч эмчилгээ бичүүлчихээд, өөрт аль таалагдсаныг нь хий гэсэн үг биш. Эмч болгон ондоо, ажлын арга барил нь ч ялгаатай. Тиймээс эмчилгээ нь өөр байж болно. Гэхдээ эмчийн бичсэн зүйл тус болдоггүй юмаа гэхэд хор болохгүй. Товчхондоо - интернэтээс юм олж уншчихаад өөр дээрээ дебилтэж туршивдаа л гэж анхааруулаад байгаа юм. 
Манай эрүүл мэндийн салбарыг өнөөдөр өндөрт байна гэж хэлэхэд бэрх. Засаг төр олон жил энэ салбарыг урсгалаар нь явуулж байгаа гэж хувьдаа дүгнэдэг. Аажуухан эрүүл мэнд бизнес болсоор өнөөдөр их хэмжээний хөрөнгө эргэлддэг сектор болчихоод байна. Нөгөө талаас чанарыг нь авч үзвэл клиникийн хэдэн том эмнэлэг, хувийн эмнэлгүүд л суурь бааз, боловсон хүчин сайтай. Сум орон нутагт чадалтай боловсон хүчин байлаа гэхнээ материаллаг бааз нь байнга дутагддаг нь нууц биш.
Засгаас иргэддээ тавьдаг хараа хяналт сул болохоор хэн дуртай нь өөрийгөө оношлоод, улмаар эмчлээд, цаашлаад янз бүрийн эмчилгээний арга барилын тухай үнэн худал бураад, анагаахын зарим салбарыг далд ортол нь муулах (манайхны элэг эмчилнэ гэж юу байхав!) юмуу хий магтаад (манайхан нүдний давхраа янзын хийдэг болж!) явж байдаг. 
Мөн өнжөөд л шинжилгээ өгч, эмчийг ноолоод байх бололцоо хэн бүхэнд нээлттэй. Өөрөөсөө эм тариа гаргахгүй л бол өвчин зовлонгоосоо бүрэн ангижирдаггүй болохоор жилийн хагасыг эмнэлэгт өнгөрөөдөг хүмүүс ч байдаг. Тэгээд л нэг оноштой эмчилгээ хийлгээд яваад байдаг - нөгөөх нь эргэж сэдрээд цикл нь давтагддаг. Бусад оронд болохоор квот, дараалал, тариф зэрэг "хүнд суртал" их. Гэхдээ нэгэнт эмчилгээ хийлгэх шаардлага гарсан бол түүнийг нь сайн хийдэг. Тиймээс манай иргэд аль эмнэлэгт хэвтвэл зүгэр вэ гэж толгойгоо гашилгадаг бол хөгжилтэй улсад иргэд нь эмнэлэгт нээх их хэвтэж барилгүй явсаар урт насалдаг.

Мельница - Дождь для нас (cover на гр. Кино)

Просто денег нет

5 сард Медведев Крымд ажлын айлчлал хийж байхдаа болгоомжгүй хэдэн өгүүлбэр хэлснээсээ болж болж одоо болтол рунетээр шоолуулсаар байгаа.
- Просто денег нет. Вы держитесь здесь. Вам всего доброго, хорошего настроения и здоровья. Товчхондоо: - Зүгээр мөнгө нь алга л да. Та нар маань тэсдэг юм шүү. Сайн сайхан, эрүүл энх, өөдрөг сэтгэл санаа хүсэн ерөөе.


Слепаков удаан хүлээлгэсэнгүй. Саваасан дуу:

Холимог хуурга

Мууртай айлын (Сэкийнх л дэ) сандалны гадаргуу. Муур гэмгүй царайлчихаад нилээн хорлонтой амьтан байгаа юм. Энэ их олон жилийн өмнөх зураг, одоо энэ сандалны поролон нь гараа биз.
Гутлын өсгийвч барьсан мэт харагдсан сурталчилгаа.
Манайханд түгээмэл нэг шинж бий. Жижиг эвдрэл гэмтлийг тоодоггүй - болж байвал явуулаад л байна. Тэгж тэгж тартагт нь тулгаж байж арай гэж нэг юм засч сэлбэдэг. СӨХ-ийн мөнгөгүй нөхдүүд, элит байшин барилгын эзэд - ямарч ялгаагүй. Уг нь мөнгийг нь авч байгаагийн хувьд асуудал үүсэнгүүт шийдэх ёстой баймаар. Гэвч хэзээ ч тэгдэггүй, ойрын ирээдүйд ч өөрчлөгдөхгүй байх. Харин жил болгон АСЕМ манайд болоод байвал ядаж төв гудамруу харсан тал нь засагдах шинжтэй.
MacBook-ийн хамгийн таалагддаг зүйл - тогны залгуур компьютертэй холбогдож буй аргачлал буюу соронзонгоор холбогддог нь. Залгуур нь бол (_|_) л до, гарын ая даадаггүй юм. Харин наалдаж тогтдог нь ухаалаг шийдэл яалт ч үгүй мөн. Залгуур татагдаж компьютер ширээн дээрээс нисчих аюул хэзээд байдаг. Бусад laptop үйлдвэрлэгчид яагаад ингэж хийдэггүй нь сонин. Бодвол патент худалдаж авах хэрэг гарах байлгүй. Sony, Dell, Коничива Toshiba г.м. гайгүй нөүт үйлдвэрлэгчийн адаптерыг нь харна - 90-ээд он.
Микки Бөмбөөлэй цэцэрлэг.
Гоё хаягтай үсчин. Сэтгэл л гаргах юм бол гоё хаяг хийж болно гэж боддог.
СБД-ийн тамгын газар. Ажилчид нь ирэхдээ нэг төхөөрөмжид, явахдаа ондоо хуруу уншигчид цагаа бүртгүүлдэг байгаа юм. Трэш шүү дэ энэ чинь, хэ-хэ.
Энэ зургийг хаана авснаа ч мартаж. Марихуана л бодогдож дарсан байлгүй.
Цаг үе өнгөрөвч сургуулийн парт бол хэзээд "ардын хүүхдүүдийн уран бүтээл"-тэйгээ. Төв ТИС-ийн ширээ байгаа юм.
Баянзүрхийн эмнэлгийн хойно байрлах дэлгүүр. КANON.
Сансрын тунелийн уулзвар. Сая зам засагдаад энэ булай төрх арилсан. Траншейны нүхийг резинэн жийрэг хийж тагалсан байсан юм. Бидон биш дэ. Ингэхэд, энэ гудамыг маш шуурхай зассан шүү. Хэзээ манайх амралтын 2 өдрөөр гудамжны асфальт тавьдаг байлаа? Гайгүй ч хийчих шиг болсон. Лайк.
Нэг зүй тогтол ажиглагдсан. Ийм хонхтой ресторан, цайны газар, бар цэнгээний газрын үйлчилгээний чанар, хоолны амт, 00-ийн ариун цэвэр 99 хувьд нь хог байж таардаг.
Саяхан машин 117 мянга дахь км-ээ гүйцээсэн. 86 мянга дээр нь авсан, 3 жил унаж байна гэхээр их бага явдаг жолооч болж таарч байгаа юм.
Барилгачин нь толгой уруу барьж аваад боочихно, оршин суугч нь хагалчихна. Энэ чинь монгол шүү дэ хүү минь!
Зарим тохиолдолд санамсаргүй хадсан бичиг их утга учиртай болдог. Жишээ нь: энэ шатаар доош буухад яг тэр "том хүн, хүүхдийн толгой бариа" гэсэн зарлалд тонгойхгүй л бол толгойгоо цохихоор байгаа юм.
Машины үйлдвэрлэгч, загварыг гараараа бичсэн нөхөр.
Төгсгөлд - shit happens цувралаас. Машинаа угаалгаад удаагүй байлаа. Хэнийг ч гомдоогоогүй, муугаар хэлээгүй, дотроо ч ад үзээгүй мөрөөрөө явж байтал зүүн талд нэг зүйл зөөлхөн тоншоод авах шиг боллоо. Харсан - цонх болон толин дээр шувуу хүндэрч орхиж. Нөгөө нигүүлсэнгүй төлөв хормын төдий үгүй болж шууд "өө, үхэж хэвтсэн муу тагтаа" гэсэн бодол цахилгааны хурдаар жирэлзээд өнгөрөв.