17 November 2019

Sigrid - Dynamite (Acoustic)

Машинаа гайхамшигтай байрлуулах урлаг

Үүнийг нууц тусгай курс дамжаагаар заадаг байхаа.

Урлаг өрхийн хүрээнд (болон бас бус зүйлс)

Дунд охины нөүт, бэкграундын зураг нь өөрийнх нь бүтээл.
Хөөрхөн зурдаг болчихоод байгаа шүү.
Зөвхөн компьютер дээр гэлтгүй үзэг балаар ч гэсэн оролдож л суудаг.
Заримдаа усан будаг ашиглаж харагддаг.
Хийх юмаа олж ядахлаар нэг иймэрхүү зүйл хийдэг бололтой.
Ямарч секц дугуйланд яваагүй, багшаар заалгаагүй гэхэд яахав дэ.
Тэгээд болоогүй ээ - хөөрхий дүүгээ шоглоостой.
Дүү нь уг нь бас зурах гэж хааяа оролддог л юм. Дээр хичээл нь эрт тарчихаар нь яалт ч байхгүй аваад ажил дээрээ жаахан байлгасан юм. 18 цаг болоод явах гэсэн нэг тоо зөрчихөөд саатсан л да.
Гэхдээ зурахаасаа илүү бичдэг юм.
Наддаа бол эр бар.
Хажуугаар нь хийгээстэй.
Би бас зүгээр суудаггүй л дэ.
Өнөөдөр орой аавынд хоол буудчихаад гэртээ ирцгээв. Машинаа байрлуулчаад хартал нүд шиг 2 нүх хайлсан байхаар нь ам зурав. Бага охин hi гэж бичиж дундах нь аавдаа хайртайгаа илэрхийлэв. Харин хүү тэр баруун талын дүрсийг л зурна лэ. Бодвол торт байх.
 Нэг иймэрхүү л амьдарч байна да...

16 November 2019

Drezden - Эдельвейс

Nizkiz - Нечего терять


Егор Летовын 55 жилийн ойд зориулсан "Без меня" трибьют альбомыг сонссон.

Puzzle угсралт

UPD 2019.11.16 20:53
Хоёр долоо хоногийн өмнө зөв хэмжээгээр жааз хийлгэж паазлыг угсарч хананд өлгөсөн болно.
Хуучин нь ч бий.
2019.09.30 12:53
Гэрт 2 хайрцаг паазл жил гаруй болж байгаа. Аль дээр хүүхдүүд угсарчихаад эргүүлээд хураачихсан юм. Өглөө хэмжээг нь гар утсан дээрээ дараад гарсан.
Жаазны үйлдвэр орж хэмжээгээ өгч жааз хийлгэв.
Гэртээ хоёр жаазаа чирээд ирсэн хойноо 2 дахь puzzle нь өөр хэмжээтэйг анзаарав. Хайрцагны хэмжээ нь ижил болохоор нэгнийх нь бичгийг харчихаад гарсан маань алдаа байж.
Ямартаа ч таарсан хэмжээтэйг нь эвлүүлсэн.
Одоо илүү гарсан жаазанд таарсан паазл олох, паазлд таарсан жааз дахиж очиж хийлгэх ажил л үлдлээ. Бөөн лай өөр дээрээ хураалаа да.

10 November 2019

Single photo

Югославын дайн.
Бурхан минь, намайг залуугаараа үхвэл диваажинруу илгээгээрэй. Тамд байж үзлээ.

New Robot Makes Soldiers Obsolete (Corridor Digital)

Мачете - Ныряй без остатка

02 November 2019

27 October 2019

Герман шошго

Герман хэл эвгүй юм.

Screenshots

Цагдаагийн ерөнхий газраас ирсэн SMS-үүд. Тэр хамгийн сүүлчийнхийн хувьд - замын хөдөлгөөнд дураараа оролцож буй нөхдүүд арай л их байнаа. Арга хэмжээ авахгүй байсаар бүрэн анаархи зам дээр зонхилж байна шүү дэ.
Тээврийн прокурор бусдаас юугаараа дутах билээ. 
Бидэнд ганц хоёр алхамын цаадхыг харах чадамж байсангүй. Яагаад бүтэн жил болж байхад сурталчилгаа, анхааруулга явуулсангүй вэ? Эхний хүмүүс угаартсаны дараа л санамжууд ирж эхэлсэн. Хотын утаа багассан, үүнтэй маргах арга байхгүй. Цахилгаанаар асуудлаа бүрэн шийдтэл ядаж бага угаартаж байвал бүгдэд л сайн. Энэ асуудлаар улс төр хийх нь буруу. Иргэдээ хамгаалах боломж байсныг харж чадаагүй нь л харамсалтай. 

Sirotkin - Выше домов. Вечерний Ургант


Хэдэн сарын өмнө Live бичлэгийг нь нийтэлж байсан байна.

17 October 2019

Сүүлийн үеийн мэдээ

Зав муутай байгаа. Нэг шалтгаан нь - зуслан дээр барилгын ажил явагдаж байгаатай холбоотой. Энэ тухай томоос том, уртаас урт пост оруулнаа. Одоохондоо яахав, халаалтаа яаж шийдэх вэ гэж бодож сууна. Туршилтын журмаар Xiaomi-гийн ухаалаг smartmi радиатор хятадаас дүүгээрээ захиалж авчрууллаа (компани нь надад үйлчилж байгаа шиг бүх харилцагчиддаа үйлчилдэг бол том респект). Сая зуслан дээрх 3х5 хэмжээтэй түр байшинд тавьчихаад ирлээ, хүйтэнд ажиллуулж туршина да ойрмогхон. Өмнө нь би Коузи хэмээх орос халаагуур туршичихаад сууж байгаа юм. Харьцуулалтыг нь дараа бас бичнээ, хэрэгтэй мэдээлэл байх болов уу.
Радиатортой цуг урд нь захиалсан кофе ба кемексууд ирсэн.
Том ба жижиг - гэрт болон ажилд зориулж авсан.
Тэгээд гүц шиг хэлбэртэй болон 3 аяга кофе найруулчих төмөр фильтэртэй жижиг сав бас ирсэн.
Хоёр долоо хоногийн өмнө Сэкийн зуслан дээр 2019 оны хаалтын үйл ажиллагаа хэрцгий явагдсан. Би хамгийн сүүлд хэзээ ингэж шартсанаа санахгүй байна, аюул. Маргааш нь арай гэж л боссон. Алкоголиос бүрэн татгалзах нь зөв шүү хэмээн өөртөө ухуулаад л хэвтээд байсан. Одоо ч мэдээж өөр бодолтой байна л да, гэхдээ ер нь кусаж барих сонин биш болоод удаж байна. Найзуудтай уулзаад даварсныг эс тооцвол их хүмүүжилтэй байгаа.

На заре

UPD 2019.10.17 00:31
Баста-гийн хувилбар.


UPD 2019.04.18 20:06
Вечерний Ургант-аар гараад амжиж өчигдөр. Хөгширчээ, хоолой нь ч сууж.


UPD 2019.04.16 21:41
Гурван жилийн өмнө нэг дууны тухай пост оруулж байсан юм. Тэгсэн энэ дууны өмнө нь нийтлэгдэж байгаагүй клип YouTube дээр тавигдангуутаа 10 хоногт 1,3 сая хандалт аваад бузарлаж буй юм байх. Эхний өдрүүдэд нь хиймэлээр хандалт цуглуулж байна гээд YouTube блоколж орхисон байсан. 30 гаруй жил дарагдсан материал гэсэн үг.


Сүүлийн үед нэрд гараад буй дуучид хүртэл каверыг нь хийгээд амжиж.


2016.09.19 16:51
Гришковец Brainstorm-той дуулсан хувилбар 2015 онд нийтлэгдэж байсан. Энэ удаа Бигуди хамтлагтай дуулсан хувилбарыг нь оруулав.
.: Линк устсан байсныг сэргээв :.

Харин энэ 1987 оны бичлэг. Хөгжимчид, үзэгчид, хөдөлгөөн, хувцаслалт анхаарлын төвд.
.: Линк устсан байсныг сэргээв :.

14 October 2019

Brutto Nostra - Мельхиор и Каспар

UPD 2019.10.14 21:36
03:51 дээр "Соло обиженного Бальтазара" гэж байгаа. Гэвч надад "Соло отпизженного Бальтазара" гэж дуулдаад байгаа. Орос хэлний мэдлэгт тань дусал: отпиздить - зодох, спиздить - хулгайлах, пиздеть - худал ярих юм шүү, андуурав.

2019.10.03 23:06

Вася Обломов - Живи

07 October 2019

HB!

Хар багын найз (ард олонд Ёжик нэрээр танигддаг болсон) Далайдаа төрсөн өдрийн мэнд!
Олон жил биднийгээ баясгаарай.

03 October 2019

ШУГТЭ

7-р сард тус эмнэлэг дээр хэдэн өдрийг өнгөрүүлсэн. Манай улсын эрүүл мэндийн системийн тогтолцоо буруугаас уу өөр учир шалтгаанаас уу - улсын хэдэн том эмнэлэг нь ачааллаа дийлэхгүй үнэндээ л цэвэр эмч ажилчдын хичээл зүтгэлээр ажил нь явж байна. Өргөсөн тангарагтаа үнэнчээр ажиллана гэдэг бахархууштай. Би хувьдаа 3-р эмнэлгийн эмч сувилагч нарын ур чадварыг өндрөөр үнэлсэн. 
Дутагдал нь: Эмнэлэг өвчтөнүүдэд л анхаардаг. Өвчтөний ар гэр үндсэндээ коридорт амьдардаг гаж тогтолцоо байдгийг мэдэж авсан.
Дээрх зөвлөмжийн ихэнх заалт зөрчигддөг. Нэг эмчлүүлэгчийн ар гэрээс хамгийн багадаа 2 хүн байдаг, 10 гаран хүн ирсэн байхыг ч харсан. Хоол ундыг хязгаарлах ямарч боломжгүй - хүмүүс шатан дээр, коридорт халуун савтай хоол цай идэж уугаад л суудаг. Эвхдэг сандал, гудас хөнжилтэй ирсэн ар гэрийнхэн ч цөөнгүй. Тамхи бол татахгүй ээ хаа очиж. 
Халаасны хулгай замбараагүй их юм шиг байгаа юм, анхааруулга алхам тутам таарна.
Мэдээлэл хүргэлт бас сайнгүй талдаа. Иймэрхүү самбараас л жаахан юм мэдэж авахаас бус жишээ нь эмнэлгийн сайтаас бол хэрэгтэй мэдээлэл олдохгүй. 
Мэдээллийн чухал эх сурвалж - тэнд хүнээ сахиж буй ар гэрийнхэн. Хоорондоо мэдээлэл солилцсоноор ихийг мэдэж авдаг юм билээ. Өвчтөн хагалгааны дараа сэхээнд байхад хамгийн хэцүү - ямарч сураг байхгүй. Сувилагчаас асууна - хэвэндээ гэсэн ганц хариулт хэлнэ. Дотогш  оруулахгүй. Ар гэрээс нэг хүн ойрхон байх ёстой гэж шаарддаг: 1-рт эм тарианд гүйнэ, 2-рт өвчтөний биеийн байдал муудаж магад. Тиймээс цонхны дэргэд шатан дээр суугаад хүлээхээс өөр зам байхгүй.
Эм тариаг ээлж солигдох болгонд авчруулдаг. Бөөнөөр нь аваад өгье гэхэд авахгүй, зөвхөн тухайн өдрийн хэрэглээнийхийг л авна. Хэл ам гардаг биз бодвол. Шатан дээр сууж байгаа зовлон нэгт хүмүүст утасныхаа дугаарыг үлдээгээд ойр зуур гарч болдог, тэрний ар гэр гэж дуудвал залгаарай гэж захиад. Зовлон хүмүүсийг ойртуулдаг гэж үнэн шүү: шатан дээр хүмүүс зовлонгоо хувааж яриад, цайгаа хувааж уугаад сууцгаадаг. 
Эмнэлэг интернэтгүй. 1-р давхарт free wi-fi байсан хэдий ч ажиллагаагүй юм билээ. Интернэт ч яахав, эмнэлэг хангах албатай ч биш, дата худалдаж авах боломж нь нээлттэй байхад. Гол асуудал - цахилгаан. Утас цэнэглэчих ганц ч залгуур public area-д байхгүй. Хайгаад хайгаад олохгүй. Уг нь байсан юм билээ, тэгээд бүгдийг нь сугалаад нүхийг нь замаскадаад будчихсан. Бодвол галын аюулгүй байдлаа хангах гэж тэр биз. Powerbank л аминд орж байлаа. Зарим хүмүүс цайны газар, аптекийн ажилтнуудад 1-2 мянган төгрөг өгөөд утсаа цэнэглүүлж байсан.
Нэг давхарт олон тооны ATM бий. Windows үйлдлийн системтэйг нь мэдсэн. Бас хульхины ундаа зардаг автомат бий, нэг шөнө 1500 төг залгиулаад ундаагаа авч чадаагүй.
Төлбөр тооцоо бүрэн шилэн болж. Хагалгаанд орлоо - ашигласан материал нь бар кодтойгоо ар гэрийхний гар дээр ирнэ. Тооцооны хуудас нь тусдаа, бүх зүйл ойлгомжтой.

30 September 2019

Макс Корж - 2 типа людей


Эрүүл мэнд, ариун цэврийн мэдээ

Бөөрөнд чулуу үүсэх гээд эмчилгээ бичүүлсэн.
Нэг хэсэг зүрхээр баахан хатгасан. Үзүүлж харуулсан - секс хийж байхад нойрон дунд ямартаа ч гэнэт хаагдчихгүй л юм билээ. Эрдэсийн шинжилгээ өгч Д витамин нэмэлтээр авч байгаа.
Хэдэн сарын өмнө 00-ийн суултууруудыг бидэтэй болгосон. Одоо би ванны өрөөнд улам хайртай болсон, суугаад л байвал суугаад л байна. Хүн бага ч болтугай ариун цэвэртээ анхаардаг, эрүүл мэндээ боддог бол бөгсөө цэвэрхэн байлгах ёстой.
Бас амаа. Үүний тулд шүд эрүүл байх ёстой, тамхи татахгүй бол сайн. Нэмээд хоолойны мах идээгүй. Тэгээд... хэл цэвэрхэн байх ёстой юм билээ, өнгөргүй гэсэн үг. Ийм хусуур Номинд зарагддаг. Эхний удаа хусаад өөрөө өөрөөсөө санаа зовсон - юуч гараад байгаа юм. Аваад туршаад үзээрэй, талархах хэрэггүй, kkk.

20 September 2019

Зөв алгоритм

Сергей Павлович Королёвын хэлсэн үг байдаг: «Не согласен - критикуй, критикуешь - предлагай, предлагаешь - делай, делаешь - отвечай!»
Маш зөв дараалал байгаа юм. Таалагдахгүй байвал шүүмжил, шүүмжилт буй бол санал болго, санал болгож буй зүйлээ хариуцлагаа хүлээж хийсэн шиг хий.
Ер нь амаараа бурах шиг амар зүйл байхгүй, харин гарт баригдаж нүдэнд үзэгдэх зүйл хийх хэцүү шүү.

19 September 2019

Кино-тойм

Must see ангилалд хамрагдах кинонууд. 
Уран сайхны кино. Курск.


Баримтат кино. Беслан.

German summer offensive of 1942 "Fall Blau"

18 September 2019

Номын сан дүүргэлт

Ням гаригт "Нэгэнт машингүй өдөр юм чинь талбай алхаж ороод ном сонирхоцгооё" гэж шийдэв.
Хүүхдүүд дутуу сурах бичгээ олж авсан. Бага охиндоо Narnia-гийн цувралыг авч өгөв. Манай гэрт ганц ном уншиж байгаа нь бага маань.
Harry Potter-ыг дуусгачихаад хэд дахин давтаж уншаад уйдаад байсан юм зайлуул.
Мөн Nepko-гийн асараас дээрээс хойш хараад мөрөөдөөд явсан номоо олж авсан.
Таван боть, янзын. Уншаад эхэлчихсэн байгаа. 
Би харамч хүн биш л дэ, гэхдээ ном ба багаж хэрэгслийг өөрийн эрхгүй хүнд өгөх дургуй. Сонирхолтой юм шүү. Тиймээс хэн нэгэн Бямбын Ринченээ өгч байгаач, уншчихаад өгье гэвэл улаан цайм урдаас нь ичихгүй "Чадахгүй ээ" гэнэ, ха-ха.