30 September 2016

Springbrook дахь амралт зугаалга

Эхний өдөр шууд давхиад Springbrook National Park орцгоов. Сайхан уул устай газар юм билээ.
Хүрхрээ нь таалагдсан (дээрх зураг гэхдээ маргааш өглөөнийх л дө).
Гурван гэл бүл унаа тэрэг, майхан хөсөгтэйгээ явцгаасан юм (надад ямар юмны майхан байхав, цуг явсан ах нар олж өгсөн). Нийт 6 том хүн, 7 хүүхэд. Ирээд сар болохдоо энэ тэрүүгээр сайн тэнэсэн ч гэлээ эндхийн хөдөөрүү хонуутаар аялаагүй байв. Сая туршлага судалж, юм мэдэж авангаа амраад авах зорилготой зугаалсан юм. Хүүхдүүдийн 3-р улирлын, эхнэрийн mid-semester-ийн амралт яг таарсан. 
Монголчууд л болсон хойно - дундаа нэг хонины махтай. Энд ирсээр хаана ч хонины гулууз олж хараагүй. Тэгсэн махны зах дээр хэлэхлээр цаанаасаа гаргаад ирдэг гэнэ. Эвдүүлэх үү гэхэд нь үгүй гэхгүй бол хөрөөдөөд хаячихдаг гэж байгаа. Зугаалганд миний үүрэг оролцоо ер нь бага байв - майхнаа хүнээр олуулчихсан, мах бас надгүй өмнөх өдөр нь ах нар эвдчихсэн.
Мань мэт нь чулуу халаагчийн л үүрэг гүйцэтгэх шив дэ :)
Хорхогийг битүү чанагчид хялбархан хийчихдэг юм байна. Брисбэнд монголоос захиж авчруулсан дөчийн бидон байдаг гэж дуулдсан (нилээн удаж байгаа гэсэн байх шүү), одоогоор гэгээн төрхийг нь хараагүй л явна. Манайхан олноороо цуглахаараа ашигладаг биз, бодвол. Сая бол гурван гэр бүлд хоёр битүү чанагч хангалттай юм билээ. 
Тэнгэр хангай янзын сайхан байсан.
Боргоцой харахлаар "Монголд самар сайхан гарсан байгаа да" гэж бодогдно.
Үдэш болоход хүүхдүүдээ майханд нь унтуулахаар оруулчихаад томчууд нь ил гал тойрсон шигээ ганц хоёр юм шоглов. Уул болохоор гэнэт хүйтэрдэг юм билээ. Мөн од сайн харагдаж эхэлсэн. Бид хэд бас зүгээр суухгүй нурманд төмс булаад амжсан.
Яг хөөрхөн дээрээ болж ирээд майхан майхандаа ороод нам. Өглөө нь би шорлог хийх ёстой байлаа.
Урьдчилаад өмнөх өдөр нь махаа дарсан байсан болохоор шорлог янзын болсон. Редакци нь нэрээ баастаагүй шүү, хэ-хэ. Дараа нь паркаар явган аялцгаав (хэлээ унжуултал алхсан да). Тэгээд өдөр нь Gold Coast орсон боловч далайд бол ороогүй - ус нь хүйтэн санагдсан. Зарим чийрэг гарууд сэлээд л байна лэ, би ч яахав, байгалийн жамаар үхсэн нь дээр гэж бодоод өвдөгнөөс дээш усанд ороогүй. Орой нь паркад мах шарж будаатай шөл хийж идээд нилээн орой Брисбэнрүү хөдөлсөн. 2 өдөрт бүтэн хонь идчихдэг л юм байна гэсэн шүү юм яриад л салцгаасан да, хэ-хэ. Сайн хүн явснаа, муу хүн идснээ. 1/3 сайн, 2/3 муу хүн болохоор пост пропорцио яг барьж.

1 comment: