30 November 2013

Цэвэр бичигтэн

Манай бага охин сургуульдаа цэвэр бичигтэн болж.
1-5 дугаар ангийнханы дунд шалгаруулалт явагдсан юм гэнэ. 
Хэдэн өдөр дэвтэр нь бусад хүүхдүүдийн дэвтэртэй бага сургуулийн коридорт өлгөгдөж.
Төдийлөн том үйл явдал биш ч гэлээ би баяртай байгаа. Учир нь манай бага эгчийгээ хичээлээ хийхэд нь эсрэг талаас нь харж суусны балагаар үсэгнүүдээ буруу харуулж бичээд болохгүй байсан юм. Бичмэл жижиг "а" үсгийг "о"-шиг зүйл бичээд урд нь дэгээ зурчих жишээний. Гэргий хөөрхөн тэмцэл өрнүүлж байж зөв бичдэг болгосон. Одоо үелж уншуулж сургах аян явагдаж байгаа. 9 сард юу ч мэдэхгүй амьтан сургуульд орж байсныг бодоход ахиц гарч л байна.

Covers

Ryan Adams - Wonderwall. Oasis.


The Polyphonic Spree - Lithium. Nirvana.

15 дугаар хорооллоор

Би сүүлийн үед 15-р хороололруу явдаг ажилтай болоод байгаа, өглөө оройдоо. Хотын хорооллуудаас 3-4, 12 таалагддаг. Яагаад ч юм 1, 10, 15 зэрэг хороолол сонин санагдаад байдаг юм. Ингээд цөөн хэдэн зураг.
Зогсох хориотой.
100 хүүхдийн цэцэрлэг гэсэн самбартай хашаа. Одоохондоо 100 машины задгай гараж.
Яг дэргэд нь хувийн цэцэрлэг орон сууцны нэгдүгээр давхарт үйл ажиллагаа эрхэлж байна. Ханаа үлгэрийн болон хүүхэлдэйн киноны баатруудаар чимж.
Анхааралтай харвал айдас төрнө.
Яагаад ч юм (өмнөх постын) армян хүүхэлдэйн кино санаанд буув.

В синем море, в белой пене

UPD 2013.11.30 21:45
Линк алагдаж. Сэргээлээ. Сонгодог бүтээл дэ. 
Энэ киног гэнэт санасан нь учиртай, дараагийн постоос мэдэгднэ.

2011.03.31
Бас л эвгүй кино шүү.

Би энэ киног анхааралтай ажиглалаа. Ер нь сэтгэж шүү. Ийм зүйл Дисней ч юм уу Союзмультфильм хийхгүй л дэ. Армянууд сайн сайн. Далд утга санаа их агуулж:
- Том нь жижгээ барьж идэж байна.
- Усан дотор акварумд байгаа загаснуудыг ондоо загаснууд харж байх юм. Хүмүүсийн нийгмийг дүрсэлж гэж ойлголоо.
- Сэлж явхад нь дээрээ тусгай цэнхэр дуут дохиотой матар дагалдаж байна. Цагдаа, дарга нарыг элэглэж.
Тэрнээс гадна бичлэгийг 01:11 дээр зогсоож хараарай. Пуужингийн дугаар нь 13, доор нь No smoking! гэсэн байгаа, ха-ха.

29 November 2013

2 дуу харьцуулалт

90-ээд оны дунд үеийн хит Coolio-гийн Gangsta's Paradise нь Stevie Wonder-ын 76 онд дуулсан Pastime Paradise дууг өөрчилсөн хувилбар гэдгийг хүмүүс тэр болгон мэддэггүй.

1. Coolio - Gangsta's Paradise


2. Stevie Wonder - Pastime Paradise

Эрхтэн шилжүүлгэ

Эрхтэн суулгах мэс ажилбарууд сүүлийн жилүүдэд эрчимжиж байгаа. Барууны зарим оронд бичиг баримт дээрээ эрхтэнээ өгөхөд бэлэн гэсэн тэмдэглэл хийлгэж болдог. Автын осолд ороод ч юмуу гэнэт чад хийхэд эмнэлгийхэн авч болох эртнүүдийг нь ар гэрийхнээс нь асуулгүйгээр өөр хүмүүст шууд шилжүүлэн суулгах эрхтэй болно гэсэн үг. Ямааны мах халуун дээрээ гэдэг шиг цаг алдахгүй байгаа юм л да. Энд нэг аюултай сөрөг үр дагавар гарч болзошгүй. Эмнэлгийн тусламж үзүүлэхгүйгээр харж байгаад хүн үхүүлэхийг байг гэхгүй шүү дэ. Цаана нь 2-3 донор хүлээлттэй бэлэн байдаг, эмнэлэгийн хувьд нэг хүн аварснаас олон хүнд эрхтэн солих нь ашигтай байдаг. Хяналт тавихгүй л бол маш осолтой зах зээл.

Иймэрхүү нөхцөлд шийдвэр гаргах ямар хэцүү гэдгийг хальт мэдрүүлэх жижиг туршилт явуулъя. Өөрсдийгөө эмнэлгийн ахлах эмч гэж төсөөл. Танд 3-4 өвчтөн бий, эрхтэнг нь солихгүй бол цааш амьдрахгүй. Өвчтэй эрхтэн болгон өөр. Нэгэнд нь бөөр, нөгөөд нь уушиг г.м. Нэг өдөр танихгүй залуу үзлэгт орохоор ирэв. Шинжилгээгээр түүний эрхтнүүд нөгөө 3-4 өвчтөнд таарах нь тодорхой болов.
Одоо хамгийн сонирхолтой хэсэг. Аль шатнаас эхэлж та түүнийг мөнх нойрсуулах нь зөв юм байна гэсэн шийдэлд хүрэх вэ?
1. Тус залууг алга болсныг хэнч мэдэхгүй, хайж барихгүй нь тодорхой ө.х. таны үйлдэл хэзээ ч хэнд ч мэдэгдэхгүй.
2. Та юу ч гардаж гүйцэтгэхгүй. Ганц гарын үсэг л зурна. Тэр залууг та хараачгүй, зөвхөн цаасан дээрх шинжилгээтэй нь танилцсан. Сувилагч нар нойрсуулж, мэс ажилбарыг нь өөр эмч нар гүйцэтгэнэ.
3. Тус залуу орон гэргүй оюун ухааны хомсдолтой нэгэн бөгөөд түүнийг нойрсуулахад ямарч өвчин зовиур мэдрэгдэхгүй. Та энэ алхамыг хийснээр түүнийг бараг зовлон зүдгүүрээс нь ангижруулна.
4. Донор 3-4 хүн нь таны хүндэлж явдаг суут эрдэмтэд. Тэд цааш ажиллавал олон мянган хүн аврах нээлт хийх нь тодорхой.
5. Донор 3-4 хүн дотор таны дотны хүмүүс бий (аав, ээж, эхнэр, нөхөр).
6. Тэр залуу эрэн сурвалжлагдаж буй манъяк болохыг та танив.
Түүнийг нойрсуулахгүй өнгөрөөж чадах уу?

Annie Lennox - Whiter Shade Of Pale

Энэхүү дуутай холбоотой өмнөх постууд:
1. Sarah Brightman дуулсан хувилбар.
2. Анхны болон 10-аад хэл дээр дуулсан хувилбарууд.

Ингээд Annie Lennox-ын хувилбар.

Муухай загварууд

Сүүлийн жилүүдэд загвар муу машинууд ихээр үйлдвэрлэгддэг боллоо. Зохион бүтээгчид нь нээх гоё зүйл бодож хийсээр эцсийн дүнд гар дээрээ үзээрийн гэгч загвартай үлддэг бололтой.
Тодорхой жишээнүүд: Nissan Juke.
Эсвэл энэ: Mitsubishi L200 пикапын хэдэн жилийн өмнөх загвар.
Ssang Yong-ын Musso ч билүү заваан гэгч загвар бас санаанд орж ирлээ.
Цааш үргэлжлүүлвэл овоо урт жагсаалт болох байх шүү.

28 November 2013

Нислэгээс айх

Онгоцоор нисэх нь ерөнхийдөө айдас дагуулдаг. Тэр тусмаа хөөрөх, газардахад. Эсвэл агаарын урсгалд орж онгоц чичирхийлэх нь төдийлөн таатай бус. Нисэх хөлөг жижиг бол бүр заваан мэдрэмж төрдөг. 
Одоо жаахан статистик сонирхоё. 1983 оноос 2000 оны хооронд болсон том жижиг осолд 53 487 зорчигч орсноос 51 207 нь амьд үлдэж. Нийт дүнтэй харьцуулвал цөөхөн хүн хорвоог зүй бусаар орхиж. 
Үнэндээ онгоцны ослын талаар бүх мэдээллийн хэрэгслээр дэндүү их цацагддаг болохоор хүмүүс нислэгийг осолтой зүйл гэж өөрийн эрхгүй бодсон байдаг.

Talk to your kids about art school

27-ны санал асуулга

2013.11.27 23:08
Машингүй өвөлжих нь тодорхой боллоо. Миний хувьд 5 дахь өдөр явгардаг болсон. Үр дүнд нь баасан гаригт хүн шиг харих байсан хүн замаараа ондоо тийш эргэх нь элбэгшсэн. Ингэж явсаар хар усанд орвол считайте коммунистом Үүлэн үст буруутай шүү, ха-ха. За арзагнах ч яахав, үнэндээ бол сэтгэл дундуур байна.
Одоо нэг зүйлийг Мобиком корпорациас хүсч байна. Хардалт сэрдэлтийг үгүй болгох үүднээс санал асуулгад sms-р хариулсан 47 мянган хэрэглэгчийг утасны дугаартай нь, хариутай нь нэг сайхан файл болгоод нэт-д тавиадхаач. Экселийн файл байхад яг тохирно, амбасын үеийн эксель хүртэл 64 мянган мөр шингээчихдэг юм. Харахад хялбар байлгах үүднээс 2 багантай: хориг дэмжигсэд, цуцлахыг хүсэгчид. За тэгээд санал асуулгад оролцсон хүмүүс өөрийнхөө дугаарыг аль баганд байгааг нь харчихна биз. Ил тод байдал гэж үүнийг хэлнэ. Санал асуулгын дүнд эргэлзэж байгаагаа нуугаад яахав.

2013.11.24 21:45
Дугаарын хязраалалттай болсон цагаас хойш би иргэнийхээ үүргийг сайн биелүүлж, хориотой өдөр нь нийтийн тээвэр, такси, хоёр зээрдээрээ ажил албаа залгуулсаар ирсэн. Орой нь заримдаа пиво уучихаж байснаа ч нуухгүй. Дулаахан цагт хамаа алга, өвөл бол үнэндээ зутардаг юм. Тиймээс саяны санал асуулгад би хориог цуцлая гэж оролцсон.
Өмнө нь захуудыг нүүлгэх тал дээр ч гэсэн би санал өгсөн. Зах гэдэг үг өөрөө хаана байх ёстойгоо заагаад байхад улаан хотын төвд Бөмбөгөр мэтийн балай зүйл байрлуулчихдаг нь сонин.
Захуудыг нүүлгэдэг нь зөв. Харин хорио тогтоодог нь буруу. Би зах дээр зогсдог, машингүй иргэн байсан бол мэдээж яг эсрэгээр санал өгөх байсан. Яалт ч байхгүй, хүн болгон өөрийн эрх ашгийн төлөө тэмцдэгээс хойш баррикадын хоёр талд иргэд талцаж гарах нь энгийн үзэгдэл. Хэн нь идэвхитэй өөрийн саналаа дэмжсэн нь, аль тал нь олонхи нь уг нь ялах ёстой. Манайд энэ зарчимаас гажуу нь эрх мэдэлтнүүд хажуугаар нь орж завааруулаад байгаад асуудал оршино. Бөглөрөл нэмэгдэх тусам иргэд төр засгийг хараана. Ойлгомжтой. Тиймээс санал асуулга явуулсан уу, явуулсан, иргэдийн дуу хоолойг сонссон уу, сонссон, хориог иргэд өөрсдөө дэмжиж байна гэдэг жүжиг явагдаж буй мэт мэдрэмж төрөөд байгаа.
Яг одоо бол: тэртэй тэргүй бөглөрөл тамтаггүй байна. Нэмсэн нэмээгүй утаа май хэмжээгүй их байгаа. Их ч унгасан өмхий, бага унгасан ч өмхий. Өөрсдөө төрийн унаа уначихаад энгийн иргэдийн эрх чөлөөг ингэж боомилж болохгүй шүү дэ. Азарга адуутай улс ганц морьтны зовлонг ойлгохгүй.
Миний үзэл баримтлал маш энгийн: Ямарч хязгаарлалт хэрэггүй. Ийм аргаар бөглөрлийн асуудлыг шийддэг ч юм биш. Нийтийн тээвэрт 1-р эгнээ, бусад нь шударга бөглөрөлдөө. Гал команд, түргэний машинд - зам тавьж өгнө, дуут дохогоо анивчуулсан дарга нарт - салаавч. Адилхан бөглөрөлдөө зогсоё. Ердөө энэ.
Яагаад дахин санал асуулга явуулах болсон нь ч сонин. Өөрсдийнх нь сайт санал асуулга дуусдаг орой ийм дүр төрхтэй байсан.
Мобикомын 100 мянган хэрэглэгчидэд мессеж илгээсэн гэх. Хэдэн хүн хариу бичсэн юм? Хэд нь хориог дэмжиж, яг хэд нь цуцлая гэв? Процент л бичигдээд байгаа нь хангалтгүй санагдаж байгаа. Хорио тогтоохдоо асуудлыг амархан шийддэг улс 3 сар цуцлах дээр новширч дуусаж буйг бид бүхэн ажиглаж байна. 
Манай төр болон иргэдийн харилцааг дүрсэл гэвэл энэ бүтээл яг таарна:

26 November 2013

Screenshots

Хадгалагдаж үлдсэн дэлгэцийн хэдэн зураг сонирхоё.
Байж болох бүх өвчин зүдгүүрийн багц ганц мессежид. Гайхалтай! нэр нь яг тохирч.
Дугаар андуурснаас болж сонин сонин зүйл гэнэт ирдэг.
news.mn сайт орос мэдээг өдөр бүр уйгагүй орчуулдаг. lenta.ru-г гүйлгэж уншаад л news.mn-рүү орохлоор гадаад мэдээ нь үг үсэггүй орчуулагдсан байдалтай байж байдаг. Орчуулгаа алдаагүй хийдэг байсан бол ч бас яахав.
Төгсгөлд нь спам. Шинэ үгс: компань, магистер. Гэхдээ хамгийн гоё нь "Сургалтыг КТМС багш заана" гэсэн өгүүлбэр.

Япон хүний газар

Би Японд очиж үзээгүй. Гэхдээ энэ улсын тухай, эсвэл ард түмнийх нь тухай сонирхолтой түүх унших тоолонд өөрийн эрхгүй "овоо гарууд шүү" гэж боддог. Ингээд ээлжит богино түүх.
Япончууд өөрийн газраа өвөрмөц байдлаар дээдэлдэг. Хэдэн үеийнх нь оршуулга хувийн газарт нь байх нь энгийн үзэгдэл гэж байгаа. 2007 оны байдлаар энд нас барагчдынх нь 99,81% чандарлуулсан бөгөөд ихэнх нь гэр бүлийнхээ оршуулгын газарт булагддаг. Ер нь удам угсаа, өвөг дээдсээ их хүндэтгэж, дурсгалд нь их ач холбогдол өгдөг. XV зуунаас хойшхи ургийн модоо мэдэж байх нь цөөнгүй.

1960 он гэхэд Токиогийн үндсэн нисэх буудал болох Ханадэ ачааллаа дийлэхээ байж эхлэв. Тэгээд Нарита онгоц буудлыг барих шийдвэр гарчээ. Засгийн газар бүтээн байгуулалтын газрыг иргэдээсээ худалдаж авахад бэлтгэж хууль хүртэл батлуулаад, түүнд газраа өгч буй иргэдэд багагүй хэмжээний мөнгө олгохоор тусгажээ. Гэвч нутгийн иргэд нүүхээс шууд татгалзав. Асуудал хурцдаж хүчээр нүүлгэн шилжүүлэх ажил өрнөв. Эмх замбараагүй байдал гарч, мөргөлдөөнүүдэд 1000 гаруй хүн бэртэж гэмтсэн тоо бий. Тэрч байтугай 3 цагдаа амиа алдав. 1978 онд нутгийн иргэд диспетчерийн албаны байрлуу дайрч юу ч үгүй болтол нь эвдэж сүйтгэжээ.
Өнөөдрийн хувьд: анх төлөвлөсөн гурван нисэх зурвасын ганц нь л баригдсан байдалтай байна. Онгоцууд фермыг тойрдог. Осака, Нагое-д шинэ онгоц буудал барихдаа хиймэл арлууд дээр байхаар төлөвлөж газрын маргааныг холуур тойрсон гэнэ.

Зөв сурталчилгаа

Иймэрхүү рекламанд би дуртай.
Харин иймэрхүү тэнэг зүйлд бол бүр нугасгүй.

25 November 2013

Харьцуулалтууд

Энд тэнд хүүхэлдэйн кино харагдаад болохоо байлаа.
5 дахь өдөр ресторанд.
Хагас сайнд машин засвар дээр. Garfield?

Wildwash

R.E.M - The Sidewinder Sleeps Tonite

Wakos монголд

Сурталчилгааны пост.
Арван жилийн ангийн хүүхэд хувийн бизнес эхлүүлээд удаагүй байна. Сурталчилаад өг гэж хэн ч надад хэлээгүй, сайн дураараа нэгнийхээ ажилд урам өгөх гэж бичив.
Хоёр 7 хоногийн өмнө би эднийхээр орж моторынхоо тосыг солиулсан. Японы Wakos тос тосолгооны материалаар үйлчилдэг юм. Тус бүтээгдэхүүний талаар би ямарч мэдэгдэхүүнгүй явсан. Тиймээс очиж үйлчлүүлэхийнхээ өмнө интернэт ухаж сонирхосон. Япондоо 1-т жагсдаг тос юм билээ. Америк, Европруу гаргадаг, ОХУ-д Урал-аас нааш бол сайн худалдаалагдаж байна. Бүрэн синтетик уг тосыг мотор нь өндөр ачаалалтай ажилладаг уралдааны болон спорт загварын машинуудад их хийдгийг мэдэж авсан.
Моторын тосны тухай бүдэг бадаг мэдлэгтэй явснаа энэ үед интернэтээс мэдээлэл уншиж байж нөхөж авав. Тос болгоны сав, шошго дээр байдаг 0W40, 5W40 г.м. үсэг тоо ямар учиртайг одоо мэддэг болсон. Өмнө нь сервист ороод л, машины маркийг хэлээд л тосоо солиулчихдаг байсан. Сая асуудалд арай нухацтай хандсан гэхүү дэ.
Мөн тус засварын газарт hybrid машины оношлогоог япон мэргэжилтнүүд гүйцэтгэж байгаа. Мэдээж ямарч япон машины дурын эвдрэл гэмтлийг 100% баталгаатай оношлоод засаад өгнө гэж би хэлэхгүй. Ямартаа ч би тэргээ оношлуулаад, ойр зуурын үйлчилгээ хийлгээд гарахдаа сэтгэл хангалуун үлдсэн.
Наад захын жишээ: би уржигдар орой эднийхээр орж свеча-нуудаа солиулсан. Мотор дээрээс багагүй эд анги тайлж байж 6 свечанд хүрсэн. Япон нөхөр салгаж буй бүх утас, эд ангид цаас нааж түүн дээр дугаар бичсэн: 1-1, 2-2 г.м. Мөн тайлсан эрэг боолтуудыг цөмийг нь төмөр савнуудад хэмжээгээр нь ангилж хийв (тэр сав нь дээр үед шүд сугалаад хаядаг байсан эмнэлгийн төмөр сав шиг). Дараа нь эргүүлээд угсралт хийхэд буцах дарааллын дагуу хийнэ. Мэддэггүй ч юмуу будилуудаа тэгж байгаа юм биш, ажлаа эмх цэгцтэй, замбараатай гүйцэтгэх энгийн арга. Эрэг боолт дутах, илүү гарах, унагааж хайж барих ямарч явдал байхгүй. Товчхондоо: цэвэрхэн, найдвартай.
Баршилын хувьд: Офицеруудын ордноос Улаанхуаран орох зам дагуу байлаж байгаа. Нэр нь Bestway Saitama.

24 November 2013

Цагаан толгой. Х үсэг

Бага охин Х үсэг үзэж байгаа. Цагаан толгой сонирхолтой сурах бичиг юм:

22 November 2013

Vexare - Where Did We Go?

Холимог хуурга

Зээг. Холимог хуурга буюу эрээвэр хураавар фото зурагнуудаас бүрддэг ээлжит пост бэлэн боллоо.
Урд өмнө УБ-т харагдаагүй замын тэмдэг. Сод монголын ШТС, ТБД андууд.
Т.Цогт-Эрдэнэ: "Twitter Facebook бол мэдээллийн хамгийн муу эх сурвалжаас гадна ам нь загатнасан зарим нэг нөхдийн бөөгнөрөл гэдгийг санах хэрэгтэй". Эргүү дагз (шинээр сурсан үг, ха-ха) мэргэжлээ соль!
Сөүлийн гудамжны гэрэлтүүлгэ. Орой 6-ийн үед 1-р сургууль.
25-р эмийн сангийн дэргэд 25 нэртэй ресторан бий болж. Дэргэд нь Kanda. Дээр үеийн барилгууд гоё өндөр цонхтойг анзаарна уу. Одоо цагт ийм цонхтой байр баригдахгүй.
Сахан EU-гийн нэг нөхөр ирээд буцсан. Сүхбаатарын талбайд авсан зураг. Европын холбооны туг байхгүй болохоор цэнхэр фон дээр хуулга наасан байгаа юм. За яахав туг олддоггүй юм байж, ядаж адилхан өнгийн хуулга олдоогүй юм байх да гэж машиндаа бодож суув.
Төмөр зам. Оршин суугчид өөр өөрсдийн ханыг дулаалдаг болсон. Шинэ материал, хуучин ханы ялгаа ямар их байгааг хар. Угсармалуудын өнгө төрхийг сэргээгээсэй билээ.
Мөн л төмөр зам. Барималчин мэргэжилтэй хүн хэзээ ч ийм зүйл хийхгүй. Керамикч, эмч мэргэжилтэй нөхдүүд хүртэл үүнээс дээр баримал хийснийг би мэднэ (манай 2 найз оюутан байхдаа ажилласан түүхтэй). Хүүхэд энэ барималаар яах юм? Яаж тоглох юм? Энийг өчиггүй нурааж хаях нь зүйтэй. Тэгэхгүй бол эсрэгээр хүүхдийн сэтгэцэд нөлөөлж мэднэ шүү тоглоомчгүй.
Үсэг тооны цуглуулга. Яах гэж? гэсэн асуулт намайг орхисонгүй.
Univision нэвтрүүлгийг яг зөв нэрлэж.
Би сүүлийн үед Нарны гүүрээр цөөнгүй зорчиж байгаа. Бетонон хаалт дээгүүр явган зорчигчид байнга давж харагддаг. Эмэгтэй хүн хүртэл юбка-тай даваад л гарчихна.
Робот-ын толгой тээвэрлэлт.
Төгсгөлд нь Номин компанийханд хандъя: 11 сарын эхээр ёлка засах нь эрүүл бус үзэгдэл нөхдөө. 2 сар дутуу, гадаа ямарч өвлийн шинжгүй байхад улаан хотын төвд балай конусаа угсарчих юм да та нар. Дашрамд, та бүхний баярын хямдрал, хонжворт сугалаа чинь он удаан жилийн турш чанараа алдалгүй (_|_) хэвээрээ үлдэж чадсан шүү, өөрсдөөрөө бахархаж болно гэдгийн дуулгая.